Lehiaketan parte hartu zuten kartel finalisten erakusketak gaur irekiko ditu ateak

Gaurko 19:00etatik aurrera edizio honetarako irudia hautatzeko parte hartu zuten 20 kartel finalistak ikusgai izango dira Aretxabaletako Arkupe aretoko hall-ean.

Huhezinemak kartel-lehiaketa jarri zuen abian azaroan eta, guztira, 53 kartel jaso zituen. Antolakuntzak Marina Garcíaren proposamena aukeratu zuen.

Leire Aranburu, Lara Fernández, Imanol Eppherre, Amaia Badiola, Marina García, Mikel Uralde, Ibon Elorrieta, Anne Baskaran, Kris Navarro, Ihabar Arriaran, Sara Izkue, Oihana Cereijo, Oscar Vicente, Danovis Acvedo, Helena Azkarragaurizar, June Baonza, Pablo Andrés Murillo, Idoia Dávila eta Ibai Silikatoren artelanak ikusi ahal izango dira aste osoan zehar.

Animatu eta gerturatu artea gozatzera!

20 kartelak gurekin dira

Advertisements

Euskal websailen lehen topaketa, Huhezineman

Jaialdia hurbiltzen ari den heinean, baditugu nobedade gehiago zuei kontatzeko aukera. Izan ere, euskal websailen lehen topaketa antolatu dugu Huhezineman. Bost websailen zenbait kapitulu ikusteko aukera izango du martxoaren 22an, ostegunean, 16:00etatik aurrera Aretxabaletako Arkupe aretoan.

Telesailak eta websailak hasiak dira mundu osoko zinema jaialdietan beren txokoa irabazten, eta Huhezineman ere jardunaldi berezi bat prestatu dugu ostegun arratsalderako: zinema aretotik sarera egingo dugu salto, eta euskal websailei begira jarriko gara. Azken urteotan, euskarazko websailek gorakada bat izan dute, eta hainbat egilerekin sareko euskarazko fikzioaren egoeraz eztabaidatzeko tartea izango dugu.

Zizerkora, Txoministak, Tokiz Kanpo, Nomofobikak eta The Coffee Advisors websailak izango dira protagonista nagusiak. Aurrenekoa, MUko ikasle talde batek sortu berri duen proiektu gaztea da, pilotua besterik ez dauka oraindik, baina Next Station plataformak lehen fasean aukeratu dituen hiru proiektuetako bat da. Taldea Josu Artutxa, Patxi Irigoien, Iñigo Otaegi, Kike Otegi eta Ibai Zabala ikaskideek osatzen dute

Etorkizunetik iraganera, 2016an estreinatu zuen Txoministak websaila Hiru Damatxo ideia faktoriak, eta 10 minutu inguruko 8 atalek osatzen dute. Euskal Herria behin betiko askatuko duen alderdi politikoaren sorrera kontatzen du websailak, gidoi umoretsu eta ironikoarekin. Hiru Damatxo Islandiarrak ekoiztetxearekin batera egun garatzen ari den Tokiz kanpo websail dokumentalaren lehen atala ere pantaila handian aurkeztuko dugu. Ekoiztetxe honen ordezkari bezala Edurne Azkarate izango da gurekin, Txoministak websaileko aktorea eta aurtengo jaialdiko epaimahaikidea.

Mugikorrik gabe etxetik irtetearen beldurrari «nomofobia» esaten zaio, eta sendatzeko abangoardiako terapia esperimental batean parte hartzen duten bi lagunen istorioa kontatzen du Nomofobikak websailak. Atal batzuen proiekzioaz gain, Olatz Beobide sortzaile eta aktorea eta Pedro Fuentes zuzendari eta gidoilaria izango dira gure artean haien proiektuaz hitz egiteko.

Saioa borobiltzeko, Lander Camarero bilbotarra New Yorken garatzen ari den proiektu baten inguruan ariko gara: The Coffee Advisors, irailaren 11ko atentatuen ikerketa independente batean murgiltzen gaituen websaila. Lehenengo atala proiektatuko dugu pantaila handian.

Bukatzeko, gerturatutako sortzaileekin balorazioa egingo dugu, formatu berri honen inguruko solasaldi bat, publikoaren parte hartzearekin.

This slideshow requires JavaScript.

 

 

 

Huhezinema 2018ko aurkezleak, prest!

Dagoeneko baditugu Huhezinema 2018an arituko diren aurkezleak. Beste urteetan ez bezala, bi bikote eta hirukote bat izango dira jaialdiaren hiru egunak gidatuko dutenak.

Alde batetik, Maider Imaz, Malen Illarramendi eta Julene Etxauri Ikusentzunezko Komunikazioa ikasten diharduten 1. mailako ikasleak, hurrenez hurren, MUko Ikasle eta Kutixi Saileko film labur finalistak aurkezten arituko dira, martxoaren 21ean. Hurrengo egunean, 2. mailako Aitziber Jimenez de Aberasturi eta Mikel Carrillo izango dira aurkezleak.

Bestetik, Hesian musika taldeko abeslari eta telebistako aurkezle den Zuriñe Hidalgo eta Iban Garciayoutuber eta Ikus-entzunezko Komunikazioko 1. mailako ikaslea, datorren ostiralean, martxoak 23, igoko dira Aretxabaletako Arkupe Kultur Etxeko oholtzara, Sail Ofizialeko proiekzioak eta sari-banaketa ekitaldia aurkezteko.

Hamaikagarren edizioko amaiera ekitaldiak arratsaldeko 16:00etatik gaueko 21:00ak arte iraungo du, eta bukatu bezain laster luntxa egongo da. 22:30ean, Hartz talde azkoitiarrak kontzertuak eskainiko du Aretxabaletako enparantzan.

IMG_1059.JPG

Zuriñe Hidalgo

11. HUHEZINEMAKO SPOTAREN ESTREINALDI MUNDIALA!

11. Huhezinemako spotaren estreinaldi mundiala.  Animazioa Marina Garciaren (Irun, 1995) ilustrazioan oinarrituta dago.  Jaialdia Martxoaren 21-22-23 izango da.
Aretxabaletako Arkupe Kultur Etxean.

Esker bereziak Hartz taldeari “Iraungitze datei” kanta erabiltzeko baimena eman izanagatik.

Huhezinema 2018ko lan-taldea: Alaine Aranburu, Iban del Campo, Asier Ezkerra, Amaia Fuertes, Andoni Imaz, Myriam Lizarralde, Leire Marimon, Saioa Murua, Andrea Navarro, Asier Olabarria, Iñigo Otaegi, Kike Otegi, Iratz Urkizu, Ibai Zabala.

Nazioarteko harribitxiak, Huhezineman

Laugarren urtez, Donostiako Zinemaldian egiten den Zinema Ikasleen Nazioarteko Topaketan hartu dugu parte. Mundu zabaleko zinema eskoletatik irailean Donostiara  etorritako ikasleen topaketa honetan, Iban del Campo irakasleak bost Ikus-entzunezko komunikazioko ikaslez osatutako epaimahaia koordinatu du eta Orona Saria eman diote topaketaren film berritzaileenari. Mondragon Unibertsitateko Imanol Eppherre, Andoni Imaz, Myriam Lizarralde, Saioa Murua eta Ibai Zabalak osatu dute 2017ko iraileko epaimahaia.

Zeit der unruhe (Elsa Rosengren, Alemania) film laburrari eman zioten Orona Saria. Telebistako albistegien dekonstrukzio umoretsua da, hiritarrek beraiek sortutako emankizuna. Film irabazleaz gain, topaketan parte hartu zuten beste lau film labur ere egongo dira ikusgai Huhezineman: University of Television and Film Municheko Find Fix Finish (Sylvain Cruiziat & Mila Zhluktenko, Alemania) Universidad Torcuato di Tellako Fiora (Martina Juncadella & Martín Vilela, Argentina), ESCACeko L’home llop (Lluís Sellarès, Katalunia) eta Luca School of Artseko The Jungle Knows You Better Than You Do (Junaita Onzaga, Belgika).

Ekitaldia martxoaren 22an izango da, goizeko 10:30etatik aurrera, Aretxabaletako Arkupe Aretoan. Saioa aurkeztu eta emanaldiaren ondorengo solasaldian parte hartzeko, L’home llop film laburreko gidoilaria den Beñat Iturbe iruñarra izango dugu gurekin.

 

 

This slideshow requires JavaScript.

Handia eta Errementari filmetako efektu berezien sekretuak ezagutu nahi?

Drama FX enpresa donostiarra, euskal zinemagintzan azken urteotan egin diren filmen efektu berezien sortzailea, izango da gurean HUHEZINEMA Euskal Film Laburren 11. edizioan. Urtero bezala, jaialdiak zinemarekin lotura duen masterclass bat antolatu du eta aurten Handia filmarekin Efektu Berezien Goya Saria irabazi dutela aprobetxatuta, ohore bat izango da gurekin izatea. Aukera paregabea, zinemaren magia eta trukoak bertartik bertara ezagutu eta gozatzeko.

Drama FX 2008an sortutako enpresa da eta Donostian du egoitza. Neurrira eginiko edozein efektu berezi diseinatu eta sor dezakete, egoera bakoitzaren beharren arabera: armak eta inpaktuak; arte zuzendaritza, atrezzo eta dekoratuen eraikuntza; hegaldi efektuak eta efektu bereziak. Azken honetan euria, behe-lainoa, elurra edo sua sortzen trebeak dira.

Aipatu bezala, Handia filmean egindako lanaz gain, martxoan estreinatu berri den Errementari filmeko efektu bereziak ere euren sinadura daramate. Hala ere, beste film hauetan ere parte hartu dute: Morir, Operación Concha, Amama, Loreak, Lasa eta Zabala, Igelak, Urte berri onamona!

Martxoak 21, asteazkenean, izango dugu zuzenean efektu bereziak zelan sortzen diren ezagutzeko aukera. Arratsaldeko 16:00etan hasi eta bi zatitan banatuko da. Lehen zatia Aretxabaletako Arkupe aretoan izango da; bigarrenean, aldiz, enparantzara irtengo gara  17:00tatik aurrera ekintza praktiko eta partehartzaile batekin. Bertan plato bat instalatu eta efektu berezien zuzeneko erakustaldi batekin girotuko dugu arratsaldea.

Masterclass-a eta ekintza praktikoa doakoak izango dira. Gerturatzen den edozein izango da zinema izar sortuko diren efektu bereziekin (sua, kea…), argazki eta bideoak egiteko aukera izanez. Hashtag hau sortu dugu ekitaldi berezi honetarako: #huhezinemafx

Animatu eta gerturatu zinemaren sekretuak bertatik bertara ezagutzera!

 

This slideshow requires JavaScript.

Marina Garcia kartel lehiaketaren irabazleari elkarrizketa

11. edizioa bueltan dugu, nobedadez betea. Horietako bat aurtengo edizioko kartela lehiaketa baten bidez egitea izan da. ‘Ikusteko jaioak gara’ leloa proposatu eta edozeinek berea propioa egiteko aukera izan du. 55 kartel jaso ondoren, antolakuntzak Marina Garcíarena aukeratu zuen. Gaurkoan berarekin hitz egiteko tartea izan dugu.

Marina García Fernández, irundarra, Sorkuntza eta Diseinuan graduatua da. Ikasketak EHUn burututa, aurten Valentzian dabil Diseinu grafiko eta Ilustrazioko master bat ikasten. Martxoaren 23an egingo dugun sari banaketa ekitaldian gurekin izango da saria jasotzeko eta film laburrez gozatzeko.

Zorionak, kartel lehiaketako irabazlea izan zara eta. Nolatan bururatu zitzaizun kartelaren estetika hori? Zerbaiten oinarritu zara?

Lehenik eta behin, mila esker. Egia esan, estetikan baino, jaialdiak transmititzen zizkidan kontzeptuetan oinarritu nintzen. Hortaz, kontzeptu hauek marrazketaren bidez islatzen saiatu nintzen, hau baita hoberen espresatzen naizen komunikazio-bidea. Kontzeptu hauek “itzultzeko” ilustrazio azkar eta arinekin egin nuen lan, betiere hainbat aspektu tekniko zainduz.

Zer adierazi nahi izan zenuen karteleko aurpegiekin?

Leloa izan zen kartela sortzeko orduan abiapuntutzat hartu nuena. “Ikusteko jaioak  gara”: irudi asko iradoki zizkidan, baina azkenean ikusleen irudiarekin geratu nintzen; denek gauza bera ikusten dute, baina bakoitzak bere moduan asimilatuz, denok baikara ezberdinak.

Gustura al zaude emaitzarekin?

Neure buruarekin zorrotza eta perfekzionista naiz, baina emaitzarekin pozik nagoela esan dezaket. Nire kartela hautatua izan zela jakiteak oso kontent jarri ninduen, jendeari gustatu zaiola jakitea beti baita pozgarria.

Esperientziarik duzu beste kartel lehiaketetan?

Diseinu grafikoa eta ilustrazioa nabil ikasten, beraz ez da kartel bat egiten dudan lehen aldia, baina egia esan ez daukat bestelako lehiaketetan esperientziarik, aurkezten dudan lehena izan baita hau.

Amaitzeko, zinezalea zara? Euskal zinema kontsumitzen duzu? 
Betidanik izan naiz zinemazalea, nire afizioen artean garrantzitsuenetarikoa dela esango nuke. Zinema munduan eguneratua egotea gustuko dut, eta film berrien estreinaldiak, merkatuan sartzen diren zuzendarien pelikulak etab. ezagutzen saiatzen naiz.
Euskal zinemari dagokionean, pozgarria da azken boladan hartutako indarra. Urteotan ateratako euskal pelikulek gure kultura zabaltzen eta indartzen dute, bai Euskal Herrian, eta baita hemendik kanpo ere. Aste honetan bertan “Errementari” filma ikusi dut.
Azkenik, Huhezinema bezalako jaialdi batera gonbidatua egoteak asko pozten nau; izan ere, zinema alternatiboagoa kontsumitzea ez baita beti erraza. Aitzitik, oso aberasgarria eta interesgarria dela uste dut.

Berak egiten dituen lanak zelakoak diren jakin nahi baduzu, bere Instagrameko kontua jarraitzera animatzen zaitugu: @marinameei

Ikusteko jaioak gara

 

20 ikasle bildu ziren asteartean Vertigo sariko irabazlea hautatzeko

20 ikasle bildu ziren pasa den asteartean Aretxabaletako kanpusean Sail Ofizialeko Vertigo Sariko irabazlea erabakitzeko. Bertan edizio honetan finalista diren lau film laburren (Kreba, Tarde para el recreo, La Petite Mort eta Zulo) emanaldia egin zen, eta segituan bozketa egin zen. Hilaren 23an, sari banaketaren ekitaldian, botoak zenbatu eta irabazlea ezagutzera emango da.

Vertigo Saria Mondragon Unibertsitateko ikasleek osatutako epaimahai batek ematen du, Sail Ofizialetik dirulaguntza publikorik gabe ekoiztutako edo banatutako filmari. Irabazleak 400 euro jasoko ditu.

Vertigo.JPG

Ikus-entzunezko Komunikazioko 20 ikaslek osatu zuten epaimahaia: Amaia Bargalló, Ane Bengoa, Uxue Botas, Mercedes del Ama, Imanol Eppherre, Asier Ezkerra, Amaia Fuertes, Alba Gonzalez, Julen Higuera, Andoni Imaz, Myriam Lizarralde, Leire Marimon, Saioa Murua, Kike Otegi, Julen Puelles, Asier Toledo, Gerardo Tomé, Iratz Urkizu, Aitor Zuazabeitia eta Aitzol Zubizarreta.

Mila esker denei parte hartzeagatik eta martxoaren 23an espero zaituztegu Aretxabaletako Arkupen, Vertigo sariko irabazlea ezagutuko dugu eta.

 

This slideshow requires JavaScript.

Dagoeneko hautatu dira MUko Ikasleen eta Kutixi Sailean arituko diren lanak

Huhezinemaren 11. edizioa hasteko bi aste ozta-ozta falta direnean, hautaketa prozesuak aurrera darrai. MUko ikasleen eta Kutixi Sailean lanak jaso ondoren, Aukeraketa Batzordeak jaialdian parte hartuko duten ikus-entzunezkoak hautatu ditu. Bi sail hauen emanaldia asteazken goizean, martxoak 21, izango da Aretxabaletako Arkupen, 10:00etatik aurrera.

MU Ikasleen Sailak Mondragon Unibertsitateko ikasleek ikasturtean zehar eginiko lanak jasotzen ditu. Hautaketa batzordeak bere aukeraketa egin ostean, epaimahai ofizialak honako sariak emango ditu: Fikzio Onenaren eta Dokumental Onenaren sariak (300€koa bakoitza), Mundukide Saria (700€) eta Argazki Onenaren Saria. Sari hau irabazita, Ogeita4 enpresak 1.500€tan baloratutako kamera ekipamendua utziko dio irabazleari, euskarazko film labur bat egiteko, 2019ko Huhezineman aurkeztuko dena. Gainera, 100€ Ikusleen Saria irabazteko aukera izango dute.

Honako hauek dira aurtengo MUko Ikasleen Sailean aukeratutako hamar film laburrak:

  • Norbanakoak (Aitor Lazkano) 11’
  • Lamia (Amaia Bargalló) 2’ 12’’
  • Your Curse, My Disease (Jon Etxeberria) 4’
  • Azkena eta etxera (Unai Gil) 11’ 59’’
  • Harriz herri (Haizea Azpilikueta) 14’ 26’’
  • Marra gorria (Unai Portilla) 17’
  • KarKarCar (Ibai Zabala) 10’ 40’’
  • Bizirik dirau (Patxi Irigoyen) 13’
  • Gazi Gozoak (Mikel Herce) 12’
  • Háblame como la lluvia y déjame escuchar (Alaine Aranburu) 8’

 

 

This slideshow requires JavaScript.

Beste aldetik, Kutixi Sailean, lanak entregatzeko epea itxita, bost lan interesgarri jaso dira. Sail honetan, MUko Donostiako Gastronomia Fakultatearekin gauzatutako lankidetzari esker, gastronomiaren gaiaren bueltako lanak bilatzen dira.

Sail honetan lehiatuko diren hautatuek epaimahai ofizialak emango duen 400€ko saria eta 100€ko ikusleen saria irabaz dezakete. Eta aurreko sailean bezala, Mundukide Saria (700€) irabazteko aukera izango dute, hiru sailetan aurkeztutako film laburren artean Giza Eskubideak eta Justizia Sozialaren gaiak egokien txertatuta dituen lana.

Hauek dira Kutixi Sailean hautatuak izan diren lanak:

  • Jan-burgesa (Egoitz Diaz)
  • Makrobiotika txokoa (Haritz Uriarte)
  • GoseApp (Egoitz Diaz eta Maialen Ortubay)
  • Artea eta kultura (Xabier Ortiz de Urbina)
  • Entsalada (Julen Higuera Lozano)

 

This slideshow requires JavaScript.

Maider Fernández, Aitor Arenas eta Edurne Azkarate, Huhezinemako epaimahai ofizialean

Huhezinema jaialdiaren 11. edizioa hasteko aste pare bat geratzen diren honetan, dagoeneko baditugu epaimahai ofiziala osatuko duten kideak.

Urtero bezala, zineman dabiltzan profesional euskaldunak ekartzen saiatzen gara gure jaialdiko epaimahai ofiziala osa dezaten, eta aurtengoan Maider Fernández, Aitor Arenas eta Edurne Azkarate izango ditugu gurean.

Maider Fernandez Iriarte (1988) Hezitzaile eta zinemagile da. Gaur egun Bartzelonan bizi da, Señor y Señora-ak ekoizturiko Las letras de Jordi filma bertan burutzen ari delako. Tabakaleran lan egin zuen ikus-entzunezko teknikari bezala, eta ondoren, bertako bitartekaritza-taldeko kide izan zen. Las chicas de Pasaik-eko partaide ere izan da. Kolektiboaren lanak hainbat jaialditan aurkeztu dira, besteak beste, Donostia, SEFF, FIC Uruguay, Filmadrid edo Nantesko jaialdietan. Ikus-entzunezkoen sorkuntza eta hezkuntza uztartzen dituen erakunde eta iniziatibekin kolaboratu eta kolaboratzen du: Mostra de Dones, UAB Master Documental Creativo, Zineleku besteak beste.

Aitor Arenas Suso (1981) Ikus-entzunezko Komunikazioan lizentziaduna da, Euskal Herriko Unibertsitatean. Hainbat film laburren zuzendari eta produktorea. Arrigorriagako Umorea Labur Komedia Jaialdiko zuzendari. Film Laburren Banaketa eta Salmenten agentzia den BANATU FILMAKen fundatzailekidea eta egungo Zuzendari Nagusia. Hainbat zinemaldi eta erakundetan kolaboratzaile, estatu nahiz nazioarte mailan. Hainbat erakunde eta jaialditan programagile, CSFFn (Txina), esaterako, non duela bi urtetik hona International Consultant lanean diharduen. Laburren Koordinadorako kidea eta AICko (Asociación de la Industria del Cortometraje) zuzendaritza batzordekidea da.

Edurne Azkarate Sobrinok (1993) Gaztela eta Leoiko Arte Dramatiko Goi Maila eskolan ikasketak burutu ostean, Grzegorz Jarzyna zuzendariarekin lan egin zuen ‘GEN’ antzezlanean, TR Warszawa konpainian. Pasa den urtean Lander Garrok zuzendutako ‘Aulki Jokoa’ programa aurkeztu zuen ETB1en, azken Euskal Herriko Bertsolari Txapelketa Nagusiari jarraipena eginez. Orain arte, otsailean Sevillako Cicus jaialdian estreinatu den ‘The Leftovers, los que se han quedado’ antzezlanaren sorkuntzan murgilduta egon da María Beato, Gloria Aia eta Juanjo Villanuevarekin. Gaur egun Antzerki Ikasketetan Eszena Zuzendaritza masterra ikasten du UNIR unibertsitatean.

Horrenbestez, esperientzia handiko bi zinemagile eta aktore bat izango dira Aukeraketa Batzordeak hautatutako lanak epaitu eta sarituko dituzten arduradunak. Honakoak izan dira epaimahaiak emango dituen sariak: Sail Ofizialean Goiena Saria; MU ikasleen Sailean fikzio onena, dokumental onena eta argazki onena; eta, azkenik, Kutixi Sailean Basque Culinary Saria.

Aurtengo berrikuntza bezala Mundukide Saria banatzeko ardura ere izango dute, eta horretarako Mundukide Fundazioko ordezkari baten laguntza izango dute Giza Eskubideak eta Justizia Sozialaren gaiak egokien txertatuta dituen film laburra saritzeko.

Epaimahai Ofizialaz gain, Vertigo Saria MUko ikaslez osatutako epaimahai batek emango du, eta sail bakoitzeko Ikusleen Saria Arkupe Aretoko emanaldietan egongo diren ikusleek erabakiko dute.

This slideshow requires JavaScript.

Advertisements
%d bloggers like this: